كل عام و أنتم بخير + فضفضة

أول حاجه أحب أعتذر بشده عن أختفائي لأني كنت أعاني من حاله متقدمه من الإفلاس الفكري مع عدم و جود جديد في الحياه ... النهارده عامل لكم بوست تلاته في واحد و كمان معاه ليفه هديه ... هههههههه
الأول
طبعا الأذكياء منكم عرفوا أني بقول كل عام و أنتم بخير بمناسبه رمضان ... و دي عبقريه في حد ذاتها ... هكلمكم عن رمضان .... بس مش هكلمكم عن الناحيه الدينيه لأن دي تخصص مدونه المنبر و أنا ما بحبش أتكلم في الدين علشان ما أقولش كلام غلط و أنا معرفش
هكلمكوا عن حاجه عزيزه قوي على قلبي .... الأكل في رمضان ... و سبب البوست ده السته بتوع صيدله منهم لله ... مركب ورق ... شوفت عندهم صوره القطايف و أفتكرت كل حاجه ... رمضان أساسا شهر العباده ... بس ده ميمنعش أن الأكل في رمضان بيبقى تحفه ... مثلا نبدأ بالخشاف إللي بيبقى في بدايه الفطار عادي كده ... مين يطول يفطر طول السنه خشاف ... يا سلام ... سيبك من الأكل الأساسي علشان ده عاوز كلام كتير ... نوصل بقى للحلو ... حبيب قلبي رمضان يمتاز بظهور كائنات لطيفه جدا مثل القطائف و اللطائف ... و الكنافه الشقراء الجميله التي يصنع منها أجمل الأطباق و أحلاها ... عندك كمان حاجه جامده جدا بتظهر في رمضان ... عيش السرايا ... ياااااااااه ... حاجه أفترى مش ممكن تلاقي كده نفسك واقف قدام الطبق مش قادر تحط عينك في عينه من الكسوف و الخجل
عرفتوا ليه الناس بتقول رمضان كريم ... علشان فيه كرم في الأكل كمان .. ههههه
سبب البوست ده أني رمضان ده أنا محروم من الأكل ده بسبب دكتور تغذيه ... شايف أن وزني زايد و لازم ينزل ... والحمد لله خسيت عشرين كيلو بس لسه فاضل أربعه كمان ... دعاوتكم معانا

الثاني

البوست التاني ده كان نفسي أكتبه من زمان بس مش لاقي الشجاعه
دايما كنت أقرا عن إنسان في سن المراهقه ... و أن المراهق ده بيبقى مصاب بحاله هبل عاطفي في الصميم ... بس أنا وجهة نظري أن المراهق المصري غلباااااان ... بيفضل طول عمره مدفون تحت الكتب و المذكرات لحد ما يخلص الفتره دي .... طبعا أنا قلت ما ينفعش أخلص الفتره دي من غير ما أعيش حاله الهبل العاطفي ... قعدت أفكر ... أحب إيه إزاي ... لقيت نفسي بحب أسكندريه أوي بس في مشاهد معينه ... مشاهد لما أفتكرتها حسيت أني عاوز أعيط
مثلا أنك ماشي في شارع بالليل في الشتا و الدنيا لسه ممطره و الشوارع مبلوله ... وصوت عربيه ماشيه على الأسفلت المبلول و بتعمل طششش ... مش عارف ليه بحب الجو ده قوي و خصوصا لو الدنيا ساقعه
كمان لو الدنيا ساقعه قوي و انت نازل الصبح بدري و البخار بيطلع من بقك و منظر العيال رايحيين المدرسه ... حاجه جميله
ريحه التراب في الجو بعد أول مره تشتي بعد الصيف
الكليه الساعه تمانيه بالليل و الطلبه تعبانه و نفسها تروح و الحارس نايم على الباب و العدد قليل
هيييييييييه ... قلبتوا عليا المواجع منكم لله
طبعا فيه حاجه كمان بحبها قوي بس مكسوف أقولها لكم ... أنا بحب الدراسه قوي ... آه و الله .. أجمل فتره في حياتي ... أقول لكم ليه ... علشان دايما الواحد بيبقى عنده هدف يعمله يكافح علشانه يسهر و يتعب له ... مش كلام مواضيع تعبير و الله ... بس نيجي للبنات مثلا ... أجازه الصيف بتبقى ترويق بيت و غسيل مواعين و وجع دماغ و الخروجات قليل و الكلام في التليفون كتيييييير .. لما تتقابلوا في الكليه كل ده بيخلص و ترتاحوا ... بالنسبه للولاد كل يوم نزل الشارع نقعد على القهوه أو نلف بالعربيه من غير هدف أو نتلم في سيبر ... فراااااااغ ... حتى السينيما خلصنا كل أفلامها ... فأحلى حاجه هي الدراسه ... و ياريت ماتفهامونيش غلط

الثالث

ده بقى أحب بوست إلى قلبي ... لأني هتناول فيه وجهة نظر ثوريه تحتاج إلى كفاح و نضال وهي : ليه أجازه الصيف بتبقى في الصيف ؟ ... جد و الله ... ليه أجازه نهايه العام الدراسي ما تبقاش في الشتا ؟ تعالوا معايا نعرض مميزات الأجازه في الشتا
عندك أول حاجه الجو بيبقى حلو قوي ... الجو ساقعه و مفيش غرق مغطي هدومك و طالع من تحت باطك
تاني حاجه الليل بيقى طويل و الطبيعي أن الناس بتحب تسهر في الأجازه فالليل لما يبقى طويل الناس هتتخمد بدري و يحسوا أنهم سهروا
تالت حاجه أني بحب فصل الشتاء جدا ... ودي ميزه مهمه فيه
بالنسبه للبحر .. دي فرصه أن أحنا نروح نعمر سيناء و نعملها مشتى محترم ... واجب وطني يعني
خامس حاجه ... الناس تروح تعمل رياضه في الأجازه و الجو حلو ... شتا بقى
سادس حاجه ... الناس كلها بيجيلها برد في الشتا ... فيقعدوا يريحوا في البيت ... خايفين على صحه المواطن
نروح للدراسه في الصيف
أول حاجه الجو هيبقى حر ... يعني هيبقى قرف المذاكره و قرف الحر لايقين على بعض
تاني حاجه اسكندريه هتبقى فاضيه لأن الناس قاعده تذاكر
تالت حاجه .. النهار هيبقى طويل ... يعني ذاكر يا معلم في النهار و خلص و الليل يبقى فاضي لك تتفرج على التلفزيون أو تتأمل
رابع حاجه ... الجو الحر ممكن يتعب الدكاتره و يخليهم يقللوا المنهج ... ههتجيب مجموع يا معلم

بذمتكوا بعد كل ده عاوزين الأجازه تبقى في الصيف ... حرام عليكوا ... فين العقل


دي كان نهايه سلسله الرذاله و الرخامه و إللي أنا عاملها ... أنا حاسس أنه كلام عبيط ... بس يا رب ما يطلعش عبيط و يعجبكوا

أستنوا البوست الجاي علشان مهم قوي ... و مش هتأخر والله