الله يقرفك

من يومين كده كنت رايح أزور واحد صاحبي الصبح من سكان منطقه كليوبترا
طبعا منطقه كليوبترا فيها سوق عظيم يسمى سوق زنانيري
أول مره أمشي في السوق ده الصبح
مشيت مستمتع بالنظر إلى جبال البطيخ و تلال الموز و البرقوق و الخوخ و المشمش
وتسليت بمشاهده البط يمرح في أرض السوق والديكه الروميه تصدر صوتها الغريب المضحك
مع تحيات حمله وزارة الصحه لمكافحه أنفلونزا الطيور
لقيت في السوق على جنب كده فلاحه قاعده و أمامها بعض الفطير المشلتت شهي الرائحه والقرص الفلاحي جميله الطعم والشكل و كرات الزبد فائح الرائحه و هضبه من البيض البلدي متناسق الشكل و أمامها إيضا بعض الخضروات جميله الشكل
أقتربت منها و أنا حاسس أني هرتكب جريمه في حق نفسي و صحتي و شرايني التاجيه
و لكن كله يغور أمام الحاجات الجامده دي
طبعا بدأ اللعاب يغطي شوارع المنطقه
أقتربت أكثر ... فوجدتها تتناول إفطارها
أصابني الفضول ... فمن يتاجر في هذه الأشياء يجب أن يكون أفطاره شهي
نظرت إليها فوجدتها تأكل لانشون و رغيف فينو و كانز بيبسي
أخدت بالها مني ... فقالت لي : ما تخافش أنا مش كل يوم باكل كده ... أنا ساعات بفطر سوسيس

يا نهار أسود
سوسيس

طبعا أنا منظرها وهي بتاكل الأكل ده و قدامها كل الخيرات دي سد نفسي و خلاني أفكر
ليه المصري تخلى عن عاداته الغذائيه القديمه
علشان كده ظهرت عندنا سرطان القولون و هشاشه العظام والأمراض البايخه دي
مش هقول إن الأكل إللى أنا جايب سيرته فوق صحي .... بس على الأقل مضمون خاماته و مكوناته

سعيييييييييييييييييييييييد

أول حاجه أحب أعتذر على تأخري في الكتابه و ده كان بسبب ظروف غريبه
ما علينا

النهارده مش هتكلم عن أي حاجه مهمه … أنا عندي تجربه جميله و منعشه …. جرب يوم كده أرمي كل همومك ومخاوفك و أحزانك وراء ظهرك و نضف دماغك خالص و حسس نفسك إن فرحان قوي
جرب معايا كده وركز
هتشوف الدنيا حاوه قوي … هتلاقي الناس الزعلانه دي ناس دماغها تعبانه … أنا جربت الموضوع ده …قمت من النوم فرحان و سعيد جدا …. و شفت الدنيا جميله جدا … مثلا أما الشوارع كانت زحمه لقيت نفس فرحان علشان هقدر أكمل شريط عمرو دياب اللي محطوط في العربيه و سمعته قبل كده سبعتلاف مره … و قعدت أطبل على الدركسيون و أرقص في مكاني …لما وصلت البيت لقيت جارنا راكن مكاني … كل مره كنت بتخانق معاه المره دي رحت بكل هدوء و ركنت وراه … حبسته في مكاني يعني .... و مشيت … طعت البيت لقيت النور قاطع … أنا ساكن في الدور السابع … طلعت على السلم تنطيط و أنا بغني و أصفق … الناس حسبتني أتجنيت … دخلت البيت نمت كتير من غير كوابيس … نزلت على الغرب كده لقيت البحر حبيبي زحمه موت … رحت نزلت مشيت على الصخور اللي تحت و انا عمال اضحك لما الموج يجي عليا … رجعت البيت قعدت أعطس بس كنت مبسوط قوي … أتفرجت على التلفزيون و نمت

دي يا جماعه دعوه للسعاده …. فيها إيه لو الدنيا وحشه ومكعبله …. بكره تروق وتحلى …. فيها إيه لو واحد حد ضايقه … مش مشكله

حب الحياه… والله هتلاقيها بتضحك في وشك
جرب كده ميبقاش وراك حاجه ولا مستني حاجه و عيش اللحظه

مش هتكلم أكتر من كده علشان السعاده دي بتتعاش و مبيتحكاش عنها

الدنيا حلوه

والمره دي مش هجيب سيره الأستاذه كده

يبقى البوست النهارده دعوه بريئه للسعاده

باي باي

بلد السبعين مليون

إكتشفت مؤخرا إكتشاف عظيم جدا بس مش هقول الإكتشاف إلا بعد ما أخلص مقدمات الإكتشاف العظيم

الموقف الأول
في يوم من الأيام أتفقت مع أصدقائي على عمل عاده غير حضاريه ألا وهي الجلوس على قهوه لمشاهده ماتش كوره
لقيت الناس كل كوره تضيع ألاقي واحد بيقول : يا حمار المفروض تلعبها على الأرض و ما تعليهاش
طبعا أنا ما فهمتش حاجه بس شكله بيقول كلام صح ما دام هو واثق من نفسه كده و أعلن عن رأيه بصوت عالي

الموقف التاني
كنت واقف في الترام لقيت تلات رجاله عواجيز وواحده ست قاعدين قدام بعض ولقيتهم بيتكلموا في الدين وعمالين يفتوا في مواضيع غريبه جدا لدرجة إني بلّمت
بس كلهم كانوا بيتكلموا بصوت عالي و ثقه وده بمثابه دعوه عامه للناس للمناقشه بس أنا طبعا ما رضيتش أتكلم معاهم ... شكلهم كده عارفين كل حاجه

الموقف الثالث
كنت راكب مع سواق تاكسي ...لقى عربيه عطلانه على جنب راح واقف جنبه و سأله بثقه :
غيرت البوجيهات قريب ... بصيت على الكبالن قبل ما تطلع .....ز غيرت السفايف بعد عشرين ألف كيلو
يبقى أكيد العيب في الكاربيراتير أو الأسبيراتير ..... عموما جرب تاخد جامب للبطاريه ..... وكارك كويس قبل ما تطلع

الموقف الرابع
لقيت واحد بيقول لصاحبه أنت شكلك كده تعبان خدلك معلقه إتافللين بعد الأكل و إنتا تبقى كويس
طبعا أنا معرفش إيه الإتافللين ده
بس الراجل شكله بقول كلام محترم

الموقف الخامس
إمبارح كنّا قاعدين قدام سان ستيفانو على البحر الساعه عشره بالليل لقينا عربيه خبطت واحد ماشي مع أخته الصغيره
طبعا أتفجعنا كلنا ولقيت الناس جروا عليهم .... البنت كانت كويسه لكن الولد أغمى عليه
لقيت كل واحد بيحاول يتعبه زياده بمحاولات عبيطه لمساعته
صاحبي قالي : قوم يا أبني إعمل حاجه
قلت له : أنا لسه في إعدادي صيدله يعني من الآخر حمار
فجأه أندفع صديقنا الثالث والجدير بالذكر أنه في كلية الآداب قسم إجتماع نحو الجماهير المحتشده حوله وقال لهم بثقة دكتور : وسعوووووووووووووا وسعووووووووووا ... عاوزين شويه هوا
بعدين لقيته مسك إيد الفتى الملقى على الأرض بثقه وحنكه ماسكه ملهاش أي معنى و قال له : حاسس بإيه ... إنت كويس
طبعا أنفجرت ضحكا من دخلته الجامده عليهم وبعدين الكشف العبيط إللي عمله عليه
المشكله إنه فتح الباب لكل الناس إللي عاوزه تجرب نفسها في الطب

الإكتشاف
بعد هذه السلسله من المواقف المضحكه أكتشفت أن في مصر سبعين مليون لعيب ومدرب كوره وسبعين مليون شيخ ومفتي و سبعين مليون ميكانيكي وسبعين مليون صيدلي و سبعين مليون دكتور
و أكتشفت إني الحمار الوحيد إللي في البلد و لسه ما بعرفش أعمل حاجه

ولا أنتوا رأيكوا إيه : أنا رأيي إن الشعب ده كده

أرض العجايب يا محروسه

بصو بقى القصه دي بدأت معايا من حوالي شهرين تعالى معايا و اسمع و استغرب

الزمن : الساعه 12 مساء
المكان : أوضتي وبحضر الكتب و المذكرات علشان أذاكر

تك تك تك تك تك تك تك تك تك تككككككككككككككككك تك تك تك
إيه الصداع ده .... طلعت البلكونه لقيتهم بيكسروا الشارع علشان يتسفلت قلت الحمد لله الشارع فعلا كان محتاج سفلته
وفضل الشارع على الحال ده لمده شهر حلفت فيه إني مش هسوق العربيه

الزمن : الساعه 12 مساء أيام الأمتحانات
فووووو تك تك تك تك تك تك فوووووووووووو تك تك تك فسسسسسسسسسسس تك تك
إيه القرف ده عندي إمتحان بكره و عاوز هدوء و أنا بذاكر ... طلعت البلكونه لقيتهم بيسفلتوا الشارع فعلا .. فرحت وقلت بكره هروح الإمتحان بالعربيه
وكانت السفلته كويسه قوي

الزمن : الساعه 12 آخر يوم إمتحانات
تك تك تك تك تك تك تك تك تك تك تك تك تك تك تك تك تك تك تك تك تك
الله يخرب بيت الصداع فيه إيه تاني ... لأ ده العمال بيكسروا الشارع علشان بيمدوا مواسير ميه جديده للحي ضمن مشروع الشركه الأمريكيه لتطوير شبكه مياه الإسكندريه
لا حول ولا قوه إلا بالله ..... أشوف فيكوا يوم

الزمن : الساعه 4,30 فجرا كنت نازل أجري على البحر
فووووو تك تك تك تك تك تك فوووووووووووو تك تك تك فسسسسسسسسسسس تك تك
ملت على عامل و سألته هما بيعملوا إيه .... قالي دول بسفلتوا الشارع تاني بعد ما شركه الميه كسرت الأرض

طب و ليه ما سبتوش شركه الميه تشتغل قبل ما تسفلتوا
نظر لي شذرا وقال : و أنت مالك يا كابتن ... روح شوف التفاهه إللي إنت رايح تعملها

طبعا ما رضيتش أنزل لمستواه و قلت حسبي الله و نعم الوكيل

الزمن : 4,30 فجرا كنت نازل أجري على البحر إمبارح
تك تك تك تك تك تك تك تك تك تك تك تك تك تك تك تك تك تك تك تك تك
بتعملوا إيه حضراتكم
والله لقينا السفلته مش حلوه قلنا نشيلها ونعيد السفلته من الأول


أنا مش هعلق أنا عاوز إللي يقرا الكلام ده هو اللي يعلق ....علشان أنا لو علقت أكيد هقول كلام مش لطيف

ممكن أقول تعليقي المعتاد
إن سبب كل ده هو : كده

تعالى أجيب لك إكتئاب

يعرف القراء المخضرمون إن معظم موضوعاتي جاءت لي أثناء مشاهدة التلفزيون مما يدلك على انه إختراع عبقري بالفعل

بعد مشاهدتي لأحد المطاردات المسليه للفأر جيري و القط توم على قناة إم بي سي 3 وجدت القناه تذيع أغنيه أطفال للمطربه نانسي عجرم تسمى شخبط شخابيط و من ضمن مشاهد هذه الأغنيه مشهد الأطفال جالسين في الحضانه , أثار هذا المشهد الحنين في قلبي لأيام الطفوله و الجلوس في المدرسه واللعب بالصلصال

و أثناء تذكر هذه الذكريات الباسمه ... تذكرت سؤال المدرسه الشهير في الحضانه

نفسك تطلع أيه لمّا تكبر ؟

كان هذا هو السؤال التقليدي في الحضانه و أنقسم الفصل إلى ثلاث مهن فقط طبيب و مهندس و ضابط شرطه

بعد تذكر هذا السؤال .... فكرت ..... ترى هل حققت حلم الطفوله

كنت أريد أن أصبح مهندسا في طفولتي حتى أرتدي الخوذه و يصبح معي لفافات ورق عملاقه

أنا الآن طالب في كليه الصيدله مما يدلك على أنني أقتربت جدا من هدفي

إذا سألتني نفس السؤال الآن سيكون ردي : مطرب , لاعب كرة قدم , ممثل , راقصه

لأنها مهن مسليه و مربحه في ذات الوقت

أردت أن أجعل الموضوع أكثر توسعا

سألت صديقي ع نفس السؤال
الإجابه : مهندس
ع طالب في تجاره إنجليزي

سألت م س السؤال ذاته
الإجابه : طبيب
و لكنه أردف قائلا: الآن أنا رأي تغير تماما أنا أريد أن أصبح مدلكاتي في شرم الشي
م س طالب معي في كلية الصيدله

دار السؤال على جميع أصدقائي فإكتشفت إن واحد منهم لم يحقق حلم طفولته إلا واحد الذي أراد منذ نعومة أظافره أن يصبح طبيبا وهو الآن في كلية الطب

الآن السؤال الحقيقي : لماذا لم يحقق أحدا حلم طفولته

الإجابه : بسبب الثانويه العامه , راجع مدونه قلم رصاص و جومة , وبسبب الظروف العقليه للطفل المصري حيث أن تدهوره العقلي يبدأ بعد دخول المدرسه
و الإجابه الأكثر منطقيه كده

رجاء لكل من يقرأ هذا الموضوع أن يجيب على هذه الأسئله

كان نفسك تطلع إيه و أنت صغير ؟
طلعت إيه ؟
نفسك تطلع إيه بعد ما كبرت ؟

تجربه مفترية : حوار بين أجيال ماتت و أخرى لم تولد بعد

دايما كنت تلاقي العيال الصغيره تحب تقعد مع أجدادهم علشان عندهم حكايات مسليه عن الزمن الجميل , زمن نهارك جميل وطقس في غاية البداعه , و تلاقي الأجداد بيحبوا يحكو عن كرتونه البيض إللي كانت بمليم والراجل إللي كان معاه عشرين جنيه فاشترى محافظه الإسكندريه و عليها مطروح هديه , و العيديه كانت شلن كانوا بيروحوا به السنيما و يحجزوا تذاكر طياره لفرنسا ويقعدوا في فندق خمس نجوم يومين ويرجعوا تاني مصر ويحوشوا الباقي
وفي نفس الوقت يشتم في الإتصالات زمان و يحكيلك عن الناس إللي بتسافر قبرص علشان تعمل مكالمه دوليه من هناك و عن الراجل إللي حب يكلم بلده في الأرياف وسافر هناك وسلم على الناس و رجع و لسه المكالمه ماجتلهوش
ويحكيلك انه شال سعد زغلول ايام المظاهرات علشان يثبت لك انه كان له في السياسه زمان ومش وهيس زي حالاتنا
كلها حكايات جميله بس إيه الهدف منها
بص يا سيدي
أنا إمبارح تخيلت إني جدو , ولميت أحفادي كريم و أحمد حوليا أنا أحكي و أبوّخ لهم زمنهم و هما يسألوني
إقرا الحوار ده يا معلم

أنا : أنتو جيل أنتو ده انتو جالكو كل حاجه على الجاهز كل واحد فيكو ماسك موبيل بشاشه هولوجرام تخلي اللي بتكلمه كأنه قاعد معاك .... حد فيكو حضر الموبايل إللي من غير شاشه أساسا أو أبو شاشه أبيض و أسود

كريم : يعني إيه شاشه

أنا : عيب تقاطع جدك وهو بيتكلم ... حدفيكو لعب بلاي ستيشي 1 .... مفيش طبعا و كان عندنا حاجه اسمها سي دي بنشغلها عليه .. مش أنتو كل بتلعبوا بلاي ستيشين 12 بمخك ... زمان كان في حاجه اسمها ذراع تحكم

كريم : يعني إيه سي دي .... يعني أيه ذراع تحكم

أنا : عيب تقاطع جدك وهو بيتكلم ..... أنتو عارفين الجنيه ده كان يعمل إيه ... ده كان يشتري باكوين بسكويت لمبادا أو كيسين شبسي ... مش دلوقتي كيس الشبسي بخمسين جنيه ... كان عندنا ورقه بجنيه لأ و إيه كمان كان عندنا جنيه معدن ...شكله أنيق كان دايره فضي من بره و جواها دايره لونها نحاسي ... وكمان كان عندنا ربع جنيه مخروم
كريم : ؟؟؟؟

أنا : عيب تبص لجدك كده .... كنا زمان بنمشي في الشارع بعربيات .. مش كل واحد فيكو عنده طبق طائر بيروح بيه المشوار من غير ما يحس ... واد يا كريم روح جبلي شزية ميه ... وأنا هستناك و مش هكمل الحكايه إلا أما تيجي

كريم : كمل من غيري لو عاوز

أنا : عيب تكلم جدك كده ... أنا هستناك

أنا : لق لق لق لق .... الحمد لله
عارف إيه الحاجه الوحيده إللي لسه موجوده لحد دلوقتي ..... المطربه اللبنانيه صباح .... إمبارح كان فرحها السبعين

أحمد - الواد ده ساكت من الصبح و أنا مش مستريح له - : و جيلكو الجميل ده أخترع إيه من الحاجات إللي حضرتك بتتكلم عنها .... وبعدين مين إللي خلى الجنيه تمنه يقل ميت ضعف .... مين كان بيستخدم التكنولوجيا بسفه علشان يستمتع بالحياه من غير فايده ... مين إللي ظلم الجيل ده بتهاونه وتخاذله

أنا : مالكش دعوه

أحمد : ليييه

أنا : علشان إحنا كبار و حريين باختصار يعني ....... كده

ساعه إلا ربع

بعد الموقف اللي فات بطلت أقعد جنب والدي وهو بيتفرج على التلفزيون علشان ما بفهمش حاجه في السياسه

ولقيت نفسي ما بقعدش في البيت كتير فقلت أستثمر وقتي في عمل مهم
عملت إيه .. لميت كل قنوات الأغاني ورا بعض وقلت أشوف مين إللي بيغني اليومين دول
قعدت أشوف أول أغنيه ... معرفتش مين الست إللي بتغني ... قلت مش مشكله دورت في بقية القنوات ما لقتش حد أعرفه

أستنيت تاني أغنيه .... برده ما عرفتش حد

خطرت لي لعبه حلوه و أهي منها ثقافه

جبت ورقه وقلم وكتبت أسم كل أغنيه جت و أنا معرفهاش و اسم المطرب
المطربه الأولى كان اسمها أمل حانينو أو حاجه زي كده و مالحقتش أعرف اسم الاغنيه بس عموما ما علّقتش معايا
تاني واحده كان اسمها ميرانور وده ينفع اسم حاجه ساقعه او باكو بسكويت والاغنيه كان اسمها بتغير عليا وبرده ما علّقتش معايا
تالت واحده كان اسمها نسرين ودي على حد علمي أول مطربه إسمها نسرين بس ما عرفتش اسم الاغنيه علشان سرحت في موضوع غريب بس ما وقفتش اللعبه كنت بتابع التلفزيون بنص عين

الموضوع إللي سرحت فيه هو اني كنت بفتكر ايام ما كنت في أولى إعدادي كان مفيش غير خمس مطربين : عمرو دياب , مصطفى قمر , هشام عباس , محمد فؤاد و حكيم

قلت يا واد انت غاوي إكتئاب ... شوف مين إللي بيغني دلوقتي بصراحه ما عجبنيش حد أسمعه ولا حتى حد أعرفه
فجأه بعد ساعه إلا ربع من الإكتئاب و الغثيان خلصت أغنيه و ابتدت أغنيه تانيه ببص على المغني لقيته للأسف الشديد المطرب صاحب الصوت العذب و الإحساس المرهف
الأستاذ المكوجي : شعبان عبد الرحيم
اتضايقت اني شوفته وفرحت إن اللعبه خلصت و هييييييييييييه
السؤال من ورا كل الصداع والكتابه واسامي المطربين إللي ملهاش لازمه
لمصلحة مين كل المطربين إللي بيغنوا أغاني إغراء دول ؟
الإجابه : مالكش دعوه
السؤال الثاني : ليه ماليش دعوه ؟
والسؤال الثاني ده إجابته سهله ومشهوره
كده

مين مع مين ضد مين ليه ؟ يبقى ايه لمين

مين مع مين ضد مين ليه ؟
ده سؤال بريء سألته لوالدي و أنا قاعد قدام التلفزيون بنتفرج على قناة الجزيره
وحصل الحوار ده

المذيع : فتح تقتل 23 من مقاتلي حماس
أنا : هيييييييييه
والدي : فرحان ليه
أنا : مش حماس دول يهود
والدي : لأ
أنا : يا خساره يعني فتح هما إللي يهود
والدي : لأ هما الإتنين فلسطينين
أنا : هما اليهد سابو فلسطين و أنا في الإمتحانات
والدي : لأ
أنا : أمال بيضربو بعض ليه واليهود موجودين ما يضربو اليهود وخلاص
والدي : أصل بينهم إختلاف وجهات نظر
أنا : قول مبرر منطقي
والدي : كده
أنا : ده مبرر منطقي

المذيع : السنّه في العراق تقتل 12 من الشيعه في العراق
وحصل نفس الحوار اللي فوق وحسبت الامريكان سابو العراق والعراقيين مش لاقيين حد يقتلوه فقالوا يقتلو بعض وبعد ما سألت والدي كان رده
والدي : كده

المذيع : معركة النهر البارد في لبنان تسفرعن 67 قتيل في لبنان
أنا : هيييه طول عمري أقول البنانيين هما الرجاله اللي عاطيين إسرائيل على دماغها
والدي : لأ المعركه دي كانت بين اللبنانين و بعضهم
أنا : ؟؟؟؟؟؟؟
والدي : كده

قبل ما المذيع يكمل مسكت الريموت و غيرت القناه لقيت عمرو دياب بيغني ليلي نهاري ؟؟؟؟؟ حسيت إنه بيتكلم عننا ؟؟؟؟

ليه
كده

إشمعنى "كده" ؟

إشمعنى كده ؟

سؤال غريب و ممكن أقولك و أنت مالك

بس مش هبدأ الموضوع لماضه

بص يا سيدي

عندك كلمة كده دي ملهاش أي معنى ولا اصل لغوي

تاني حاجة هي ان احنا بنستخدمها كتير اوي

كام مرة وأنت ماشي في الشارع مسطول فرملت عليك عربية و طلع لك راجل مكشر من الشباك و بيتفتف ويقولك : "فيه كده " طبعا ممكن ترد عليه وتقول له : " لأ مفيش بس ممكن تسأل عند المحل إللي قدام " بس أنا مضمنش النتيجة

تقتكر الراجل ده كان قصده ايه بكلمة "كده " وكان متنرفز ليه

ممكن تعمل حاجه حلوة تقلاقي صاحبك بقول لك : " أنت كده " تفتكر يقصد ايه

أكيد يقصد انك كده أو كده أو كده أو ممكن كمان كده

لحظه واحده ..... الشاب إللي واقف هناك على اليمين ... أيوه انت ..لو شفتك تاني بتغمز لما اقول " كده " هابعت لك فيروس او اطلعك بره ماشي

كلمة كده كلمه سحريه مثلا لو جعت ممكن تحطلها حرف الباء و تبقى كبده تعملها سندوتش

ممكن لو اتزنقت في موضوع تحطلها باء برده وتبقى كدبه بيضه تطلعك من مشاكلك

فكر كده في كلمة كده هاتلاقيها الاجابة على كل الحجات اللي محيره الناس في المحروسه و الوطن العربي

فاهم قصدي ولا انت شكلك كده ولا كده أو كده

ملحوظه للشاب اياه : قابلني بره بعد المدرسه