أول حاجه أحب أعتذر على تأخري في الكتابه و ده كان بسبب ظروف غريبه
ما علينا
النهارده مش هتكلم عن أي حاجه مهمه … أنا عندي تجربه جميله و منعشه …. جرب يوم كده أرمي كل همومك ومخاوفك و أحزانك وراء ظهرك و نضف دماغك خالص و حسس نفسك إن فرحان قوي
جرب معايا كده وركز
هتشوف الدنيا حاوه قوي … هتلاقي الناس الزعلانه دي ناس دماغها تعبانه … أنا جربت الموضوع ده …قمت من النوم فرحان و سعيد جدا …. و شفت الدنيا جميله جدا … مثلا أما الشوارع كانت زحمه لقيت نفس فرحان علشان هقدر أكمل شريط عمرو دياب اللي محطوط في العربيه و سمعته قبل كده سبعتلاف مره … و قعدت أطبل على الدركسيون و أرقص في مكاني …لما وصلت البيت لقيت جارنا راكن مكاني … كل مره كنت بتخانق معاه المره دي رحت بكل هدوء و ركنت وراه … حبسته في مكاني يعني .... و مشيت … طعت البيت لقيت النور قاطع … أنا ساكن في الدور السابع … طلعت على السلم تنطيط و أنا بغني و أصفق … الناس حسبتني أتجنيت … دخلت البيت نمت كتير من غير كوابيس … نزلت على الغرب كده لقيت البحر حبيبي زحمه موت … رحت نزلت مشيت على الصخور اللي تحت و انا عمال اضحك لما الموج يجي عليا … رجعت البيت قعدت أعطس بس كنت مبسوط قوي … أتفرجت على التلفزيون و نمت
دي يا جماعه دعوه للسعاده …. فيها إيه لو الدنيا وحشه ومكعبله …. بكره تروق وتحلى …. فيها إيه لو واحد حد ضايقه … مش مشكله
حب الحياه… والله هتلاقيها بتضحك في وشك
جرب كده ميبقاش وراك حاجه ولا مستني حاجه و عيش اللحظه
مش هتكلم أكتر من كده علشان السعاده دي بتتعاش و مبيتحكاش عنها
الدنيا حلوه
والمره دي مش هجيب سيره الأستاذه كده
يبقى البوست النهارده دعوه بريئه للسعاده
باي باي
يبقى البوست النهارده دعوه بريئه للسعاده
باي باي
هناك 4 تعليقات:
وليه مش تجيب سيرة الأستاذ كده
يا بني ده الموضوع ده كده واحسن من كده كمان
بجد فكره هايله جدا وتصدق انك فعلا لما تقرر انك تكون سعيد برغم المعوقات في الأول تلاقي كام حاجه معانداك وبعدين خلاص الواقع بيستسلملك ويكون حلو وماشي عال العال
وعلى فكره انا سمعت في الجامع مره ان ربنا بيدي كل واحد اللي هو عايزه يعني لما تجيلنا مصيبه ونقعد نحزن عليها كتييييير قوي فربنا يدينا حزن اكتر عشان احنا اللي عايزين كده ولو احنا قلنا انا لله وانا اليه راجعون وصبرنا واخدنا الأمور ببساطه تبص تلاقي ربنا جعلك كل حاجه سهله ةالمشكله عدت على خير وفيش مشاكل خالص
بجد فكره هايله وياريت نعرف نطبقها بس يا خساره انا معنديش شط اسكندريه اتمشى عليه زيك
امانه عليك يا شيخ تسلملي على اسكندريه كلها ماشي
سلااااااااااااااااااااااااااام
و الله ي شنكوتي يا كبير أنت مش متخيل التجربه دي غيرتني أد إيه ... كل حاجه بقت أحسن في حياتي بكتير قوي لدرجه أنهم في البيت أتفجعوا و حسبوني بتعاطى حاجه بس الموضوع عدى على خير الحمد لله
إسكندريه كلها بتسلم عليك والبحر قال لي يبعت لك موجه قلت له لأ ألا تغرق الأسكندريه .... والشنكوتي بيحبها أوي
أنا سعيد لتلبيتك للدعوه
سلااااااااااااام
مش عارفة سيبنى أفكر شوية..
طيب نقولها بالعكس..
افرض انك لما قمت من النوم قمت متعكنن يبقى حتفضل مصمم انك تبقى مبسوط بردو ولا ده كان صدفه عشان قمت موودك رايق؟؟
انا فعلا عمرى ما جربت انى ابقى سعيده و مبسوطه بالدراع معرفش ليه يمكن عشان موضوع الإجبار ده ف حد ذاته مش بيخلى الواحد سعيد؟؟مش عارفة بس فكرة جديرة بالمحاوله يمكن عشان الواحد بقالو كتير ضارب بوز و عامل تمانيات ف حواجبو أو يمكن عشان كده..
المرة دى قلتها مكانك أهو عشان دى علامة مشجله ماينفعش تتشال من المدونة خالص..
الحمد لله انك مبسوط و عقبالى يا رب.. حاجرب و نتفاهم بعدين سلام.
يا كوين مش مشكله مودك عامل إزاي و أنت صاحي من النوم .... يعني مثلا أنا النهارده الصبح مفقوع زومبا ممكن في الظروف العاديه تخلي أهل إيطاليا يتضايقوا من علو صوتي
صاحبي إللي بقابله كل يوم على البحر سابني قاعد تلت ساعه و مجاش
ببساطه شديده قمت من مكاني وجريت لوحدي و كانت تجربه هايله ... وجريت أحسن
لييييه
علشان كنت فرحان و ماليش نفس أتضايق
جربي كده بدل ما العكننه و البوز يخلوكي تعجزي بدري ... أنا مش بطلب أنك تكنوني مستهتره
أنا بطلب أنك تكوني سعيده ... وده هيزود قدرتك على التفكير في المواقف الرذله
فكري كويس هتلاقي كلامي صح
سلااااااااااام
إرسال تعليق