من يومين كده كنت رايح أزور واحد صاحبي الصبح من سكان منطقه كليوبترا
طبعا منطقه كليوبترا فيها سوق عظيم يسمى سوق زنانيري
أول مره أمشي في السوق ده الصبح
مشيت مستمتع بالنظر إلى جبال البطيخ و تلال الموز و البرقوق و الخوخ و المشمش
وتسليت بمشاهده البط يمرح في أرض السوق والديكه الروميه تصدر صوتها الغريب المضحك
مع تحيات حمله وزارة الصحه لمكافحه أنفلونزا الطيور
لقيت في السوق على جنب كده فلاحه قاعده و أمامها بعض الفطير المشلتت شهي الرائحه والقرص الفلاحي جميله الطعم والشكل و كرات الزبد فائح الرائحه و هضبه من البيض البلدي متناسق الشكل و أمامها إيضا بعض الخضروات جميله الشكل
أقتربت منها و أنا حاسس أني هرتكب جريمه في حق نفسي و صحتي و شرايني التاجيه
و لكن كله يغور أمام الحاجات الجامده دي
طبعا بدأ اللعاب يغطي شوارع المنطقه
أقتربت أكثر ... فوجدتها تتناول إفطارها
أصابني الفضول ... فمن يتاجر في هذه الأشياء يجب أن يكون أفطاره شهي
نظرت إليها فوجدتها تأكل لانشون و رغيف فينو و كانز بيبسي
أخدت بالها مني ... فقالت لي : ما تخافش أنا مش كل يوم باكل كده ... أنا ساعات بفطر سوسيس
يا نهار أسود
سوسيس
طبعا أنا منظرها وهي بتاكل الأكل ده و قدامها كل الخيرات دي سد نفسي و خلاني أفكر
ليه المصري تخلى عن عاداته الغذائيه القديمه
علشان كده ظهرت عندنا سرطان القولون و هشاشه العظام والأمراض البايخه دي
مش هقول إن الأكل إللى أنا جايب سيرته فوق صحي .... بس على الأقل مضمون خاماته و مكوناته
هناك 6 تعليقات:
الله يقرفها يا دكتور كده
الحاجات اللى قدامها دى للبيع فقط و مش للاستخدام الشخصى يعنى قطع ايد أى حد من عيالها لو اتمدت على بيضة من بتوع البيزنس..
و غير كده انا مش موافقاك خالص ف موضوع ان البيض و الفطير و الحاجات الجامده دى غير صحية بالعكس ده اللى صحته تعبانه بيقولولو كل من الحاجات دى لكن كل حاجه بالمعقول كويسه.و طول عمر الناس بتوع مرحلة ما قبل البورجر و السوسيس عايشين على البض و صحتهم كويسه.
الحاجات دي مش صحيه قوي علشان احنا بنتكلم عن زيت غير مشبعه وحاجات كده
ونسبه كوليستيرول
بعدين بلاش عيالها ياكلوا منها ... هي تاخد واحده في الخباثه
ايه الكلام المجعلص ده ...
كوليسترول مين وصحة ايه
نفض يا راجل...
وكمان انت كان لازم تشك انها ليه مش بتاكل من اللى بتعمله
يبقى فيها ان وكان ولابد كمان :p
مدونتك حلوة...
وفيها ريحة اسكندرية :D
فطير وبيض بلدي وزبده
يا ابني حرام عليك جوعتني
طيب انت عارف ان ده عادي جدا انهم يكونوا بياكلوا اي حاجه رخيصه وحاجاتهم يبيعوها عشان البيزنس على رأي البت استيكه طيب انت عارف ان في الريف دلوقتي لقيتهم غيروا حاجات كتير كانت عندهم زمان بس مجاملة لينا بيعملوهالنا يعني تقريبا اصبحوا بيعتمدوا على العيش المدعم من الحكومه وبدل الزبده الفلاحي اللي بتخلي البيض البلدي احلى من كنتاكي نفسه اصبحوا بيستخدموا السمن النباتي اللي بيسموه هولندي
وحاجات كتير نسيوها خلاص اللي بيعملوه منها بيكون للتجاره فقط مش لأستخدامه الشخصي الا في المناسبات او زياره من احد المدنيين زي حالاتي يقوموا يجاملوني ويعملولي الطبيخ بالسمن البلدي وبفضل اكل في بلدنا زي المجانين من غير تفكير في الكلسترول ولا غيره
عموما مره كل كام شهر مش تضر
عموما حلو قوي انك يتشوف الناس وتلاحظ حياتهم
برافو يا واد اسكندراني
تحياتي
سلاااااااااااااااااااااام
أهلا باستاذ نا السفاح الكبير قوي
هو فعلا ممكن تشك في الحاجه إللي بتبيعها
بس المشكله إن الريحه كانت جباره
يعني صعب تكون الحاجات مضروبه
أنا وجهة نظري أن هيه حاسه أنها كده روشه و حاجات زي كده
عموما أهلا بيك عندي و يارب تيجي كتير
يغيروا زي ما يغيروا يا شنكوتي
أهم حاجه أما نروح نلاقي الحمام المدفوس في برام الرز المعمر المعمول بكبد الوز و الجلش باللحمه المفرومه و يا سلام على البط المستوي مع رز بالجزر و البسله
و الفطير الشلتت بالبيض المقلي أو بالقشطه والعسل
ويا سلام على القرص إللي بتاخدها معاك وأنت مروح
حاجه حكايه
كفايه كده كلام عن الأكل علشان الكيبورد أتبلت من كتر الرياله
عموما فانا شايف ان الست دي كانت بتاكل الحاجات دي بفخر مش علشان أرخص و لكن علشان بتحس أنها بتاكل حاجه جامده
سلاااااااااااااااام
إرسال تعليق