شارعنا

كنت ماشي في شارعنا ... و خير اللهم ما أجعله خير لقيت عماره سبعتلاف دور بتطلع في أرض كانت فاضيه و الناس بتركن فيها عربياتها
و إمعانا في تنبيهي بالبناء الجديد إللي بيظهر ... وقعت طوبه و خبطت في وشي ... مش في دماغي لسوء حظكم .... و فجأه لقيت دم في إيدي مطرح الخبطه ... لقيتها عملت ندبه خفيفه أوي في وشي ... ندبه يعني بشله يا بهوات ... و بعدين بصيت فوق و أطلقت سيلا من الشتائم ... بص لي العامل إللي فوق وقال لي ... معلش يا باشمهندز ... و خلص الموقف

قعدت أفكر في شارعنا حبه حلوين كده و فكرت ... الشارع ده كان عامل إزاي و انا صغير ... بكثير من العسر أفتكرت منظر الشارع كان شكله إيه ؟؟؟
كان فيه كذا أرض فاضيه بقت ابراج و عمارات كبيره
كل ده طبيعي ... بس لما روحت بيتنا ... قلت ابص على آثار العدوان إللي حصل على وشي بفعل زلطه صغيره ... لقيت حته وارمه ... و تعويره صغيره لا تذكر ... بس سابت أثر في نفسي ... و قعدت أبص على وشي شويه و فكرت ... أنا وشي عامل زي شارعنا ... لأ يا خفيف ... محدش حفر فيه علشان يدخل غاز طبيعي ... عامل زي شارعنا أنه أتغير كتير عن ما كنت و انا صغير ... و أكتشفت أن الواحد بيكبر ... و دي ملحوظه ذكيه ... محدش أخد باله منها إلا أنا ... و شكلنا بيتغير ... انا مثلا بقالي سنتين في الكليه و داخل التالته ... إمتى هبطل أخد و أبدأ في العطاء

دي كانت البدايه ... و رجعت أفتكرت شارعنا ... بدأ بالأخذ ... سفلته و تصميم و حركات كده ... و بعدين شغال دلوقتي في العطاء من قبل ما أتولد ... حد فاهم حاجه ؟؟؟
أنا مش فاهم أنا عاوز إيه ... بس الكلام شكله عميق ... عندك طول هناك يا كابتن ؟؟؟؟
الخلاصه ... الواحد لازم يعيش حياته بصوره كويسه علشان يكون تأسيسه كويس و في نفس الوقت ما يقرفش نفسه ... و في نفس الوقت لما يبدأ في العطاء يبقى زي شارعنا ... لا يبخل في العطاء

و في يوم من الايام هتبقى مسؤول عن شوراع صغيرين ... آآآ... آسف أطفال صغيرين ... تحط لهم أساس أحسن من اساسك علشان يطلعوا شوارع جامده و كويسه
ولا إيه ؟؟؟