الله يسامحه

النهارده كنت ناويلكم نيه مهببه .... كنت هعمل بوست كارثي .... بس حصل معايا موقف جابلي أكتئاب ... قلت ما أحرمكومش

النهارده أتصل بيا واحد صاحبي و قالي إيه .... عوزين ندخل سينيما ... قلت له ماشي بس الساعه كام .... قال لي حفله 8.30 مساء ... قلت له معاد جميل و أنا موافق

و في تمام الساعه الثامنه إلا ربع بدأت أغير هدومي .. قلت ألبس النهارده كلاسيك بلاش كاجوال ... طلعت القميص الفان هاوزين السماوي و البطلون البيج و الحزام البني و الجزمه التمبرلاند البني و النضاره البني

وقفت لأول مره أحفلط في نفسي لمده ربع ساعه ... بصيت في ساعتي لقيتها الساعه تمانيه ... رحت داخل أتوضا علشان أصلي المغرب في السكه و أنا رايح المول إللي فيه السينيما ... الساعه تمانيه و ربع دخلت المسجد ... و قلعت الجزمه و الشراب ... معرفش ليه قلعت الشراب .... و حطيتهم ورايا بالضبط ووقفت أصلي ورا الإمام

خلصت الصلاه و .... أيوه بالضبط ... حصل إللي توقعتوه ... برافوا .... ما لقيتش الجزمه ... طبعا شعرت بالصدمه من أن شخص يسرق داخل مسجد و بالحزن الشديد على الجزمه علشان كانت مريحه و غاليه ... 500 جنيه ... قعدت أبص حوليا يمكن أشوف إللي خدها ما لقيتهاش ... وقفت محتاس مش عارف أعمل إيه ... بعدين ركزت شويه ... ورحت لفراش المسجد عطاني شبشب حكايه علشان أروح بيه

طبعا أنتو عارفين أن الشيطان شاطر جدا و متفوق ... راحت دماغي فين ؟

فكرت و قلت لنفسي ... يعني ده جزاة إللي يدخل يصلي في مسجد ؟.... يعني أبطل أصلي جماعه بعد كده ؟ ... وقعدت دماغي تودي وتجيب لحد ما لقيت نفسي قدام بتنا ,,,, المشوار أتضرب كده

بعدين فكرت ... قلت يعني مثلا إللي سرقها هيبيعها بكام ... خمسين جنيه ؟ ... والله لو كان جالي كنت عطيتهالوا بدل ما يشيل ذنب السرقه

و لما قلت لوالدي ... قال لي .... يا أبني الشعب جاع و مش لاقي نقطه الميه .... يعني اللي حصللك ده هيجي إيه جنب إللي بيسرقوا غطيان البلاعات و حنفيات المساجد

أفتكرت حاجه تموت من الضحك .... مره في الكليه عندنا حد سرق الشطافات من حمام الولاد ... شوف وصلنا لدرجه إيه

ما بقيتش عارف ألوم مين .... الفقر إللي خلا الناس بتاكل بعض ... ولا المرض إللي بياكل جتت المصريين .. أمراض قلب و كبد و كلى ... ولا ألوم الحشيش إللي بتدمنه الطبقات الدنيا و بيخليهم يسرقو علشان الكيف بيذل

ما بقيتش عارف أشتكي لمين ... قلت لأصحابي قعدوا يضحكوا .... محدش راعى أني كنت زعلان فعلا .... قلت علشان تحسوا بيا أحطيلكوا صوره الشبشب إللي روحت بيه



إيه رأيوكوا ؟

معفن مش كده ؟

في النهايه أكتشفت أن الشعب ده لو محدش شافه عاوز إيه ... هياكل بعضه ... علشان مهما رقبته طولت مش هيطول يهبش
شعب الله المختار
إللي عايش في مارينا و شرم الشيخ و الغردقه
مجتمع الميت ألف
حيث الثراء الفاحش و المصروف اليومي للأبناء الذي يزيد عن ألفين جنيه ... يومي هه ؟
كفايه كده علشان شكلي هبدأ أعك

عموما .... أستنوا البوست الجاي ... علشان بإذن الله هيكون صدمه و تجربه تدوينيه جديده تماما ... و أعتقد أني تقريبا هكون أن شاء الله أول واحد يعمل العمله دي

و الله يسامح إللي سرق جزمتي و يارب تتردله أضعاف من حيث لا يحتسب